மங்குனி ஹைகோர்ட்டில் ஜாமீன் மனு

டீ கிளாச நங்குன்னு சத்தத்தோட வைக்கும் போதே தெரிஞ்சிருச்சு இன்னும் என்னோட வீட்டு காரம்மாவுக்கு கோபம் தீரலன்னு(உனக்கு வீட்டுல டீயெல்லாம் தர்றாங்களா ?) . இதென்னங்க அநியாயமா இருக்கு , நேத்து நைட்டு பூராம் வெட்கம் , மானம் , ரோசம் எல்லாம் தட்கல் டிக்கட் வாங்கி வைகை எக்ஸ்ப்ரெஸ் புடிச்சு போற அளவுக்கு சொரனைகெட்டுப்போயி திட்டு வாங்கினது நானு, அக்சுவலா நான்ல கோபப்படனும் .(என்ன அக்சுவலா , பெசிகளா , பிசிகலான்னு பீலா விடுற , எங்க ஒரு வாட்டி கோபப்பட்டுத்தான் பாரேன் ?)


ஒன்னும் இல்லைங்க , நேத்து நைட்டு வீட்டுக்கு போயி சாப்பாடு வைம்மான்னு ஒரு வார்த்த தாங்க சொன்னேன்.

"பாவம் அந்த பொண்ணு துளசி , அவ வீட்டுகாரர அவ கண்ணு முன்னாடியே வெட்டி போட்டானுக , இத கேள்விப்பட்ட துளசியோட அப்பாவுக்கு ஹார்ட் அட்டாக் வந்திருச்சு , இந்த நேரத்துல துளசிய கள்ளக்காதல்னால அவளே ஆள் வச்சு புருசன வெட்டிட்டான்னு பொய் கேஸ் போட்டு போலீஸ் துளசிய அரஸ்ட் பண்ணிட்டாங்க, பாவம் துளசின்னு நான் கவலை பட்டுகிட்டு இருக்கேன் , உனக்கு (நல்லா கவனிங்க ஒருமை ) சாப்பாடு கேட்குதா சாப்பாடு............????? "

எனக்கு நெஞ்சமெல்லாம் பதறிப் போச்சு ஐய்யய்யோ .... அடப் பாவமே , யாரும்மா அந்த துளசின்னு பதறிப்போய் கேட்டேன் .அது "தென்றல்" சீரியல்ல வர்ற ஹீரோயின் துளசியாம்.

(நமது பன்னிகுட்டியின் விருப்பத்திற்கு இணங்கி படம் சேர்க்கப்பட்டுள்ளது )

அடக் கொடுமையே , ... டி.வி சீரியல்ல ஹீரோயின அரஸ்ட் பண்ணினா நான் என்ன சார் பண்ணுவேன் ???.

டீ கிளாஸ வச்சிட்டு , "ஏங்க அந்த பொண்ணு துளசிக்கு ஜாமீன் கிடைக்க நாலு நாள் ஆகும்ன்னு சொல்றாங்க , பாவம் அந்த பொண்ணு , நீங்க கொஞ்சம் ஜாமீனுக்கு ட்ரை பன்னுங்களேன் ."


என்னது டீ.வி சீரியல்ல நடக்குரத்துக்கு ஜாமீனா ??? அடக்கலிகாலமே ...............

நாம நம்ம வீட்ல எதிர்த்து பேசமுடியுமா ? முடியாது...............

சரின்னு நேரா ஹை கோர்ட்டுல போயி ஒரு ஜாமீன் மனு தாக்கல் பண்ணினேன் . ஜட்சு என்னைய நேசனல் பெர்மிட் லாரில அடிபட்டு செத்துப்போன சொறிநாய பாக்குற மாதிரி பாத்தாரு .....

உங்களோட சேத்து மொத்தம் 1647255 மனுக்கள் இந்த கேசுக்கு ஜாமீன் கேட்டு பைல் ஆகி இருக்குன்னார் . (அட....நாம மட்டும் அடிமை இல்லை , நம்மள மாதிரி ஊருக்குள்ள நிறையா பேரு இருக்காங்கன்னு மனசுக்குள்ள ஒரு நிம்மதி )

அப்புறம் ஜட்சு லேசா கண்ண தொடச்சுகிட்டு (ஒய் பிளட் , செம் பிளட் ,.... பாவம் அவரும் அவுங்க வீட்ல பாதிக்கப்பட்டு இருப்பார் போல ?) என்னைய பாத்து இந்த கேச நாலு நாள் தள்ளி வக்கிறேன்னு சொன்னாரு .... என்னான்னு கேட்டா அந்த சீரியல்ல ஜாமீன் மனுவோட தீர்ப்பு அன்னைக்கு தான் சொல்றாங்களாம் , அத பார்த்துட்டு இவரு தீர்ப்பு சொல்கிறாராம் .

டிஸ்கி : இதற்காக ஹைகோர்ட் வளாகத்தில் சங்கம் ஆரம்பிக்கப் பட்டுள்ளது . மனுதாக்கல் செய்பவர்கள் வந்து சங்கத்தில் இணைந்து கொள்ளலாம்.